مكتبة كلمات اغاني زيدان ابراهيم

اسير حُسنك

اسير حسنك يا غالي
في ريدك كم بغالي
اشيل من طبعك انت
واصبح حالي حالي
يا عبير يانسمه هاشة
ويافرح مليان اعاشة
شيل سنيني وشيل
نداها وشيل معاك
كل البشاشة
قول لي الغيوم
لو تاني رحلت وين
بين ظلال عينينا ماشة
سر جمالك في عيونك
غيمة تحضني وتسافر
تملي كل دنياي فرحة
وتبقي بكرة امل لباكر
يا حلات دنياي جمبك
ويا حلاتك وانت نافر
مستحيل دنياي تبسم
اوتفرح مرتين
ما خلاص ادمنت ريدك
ولهتك عيني سنين
وريني لما يطول غيابك
والقي تاني الفرحة وين

اللهفة


لو تعرف اللهفة والريد والعذاب..
والشوق بطرق فى دروبك الف باب...
لو تعرف دى الدنيا من بعدك سراب..
ماكانت روحت وكنت طولت الغياب ...
***
كنت فاكر الشوق يجبك والحنين..
وتعود لقلبى الفى هواك صابر حزين...
لكنو بس طال الصبر بالسنين...
يا الروحت طولت الغياب ..
لو تعرف اللهفة والريد والعذاب..
والشوق بطرق فى دروبك الف باب...
لو تعرف دى الدنيا من بعدك سراب..
ماكانت روحت وكنت طولت الغياب ...
***
الليل حزين دمعاتى صامته بتبللو...
ممتد طويل ماليهو حد فاقد نهايتو...
بالله كيف اقدر اطيق واتحملو...
يا الروحت طولت الغياب ..
لو تعرف اللهفة والريد والعذاب..
والشوق بطرق فى دروبك الف باب...
لو تعرف دى الدنيا من بعدك سراب..
ماكانت روحت وكنت طولت الغياب

اخونك؟


كلمات : محمد جعفر عثمان

/*/* !
أخونك .. هل تصدق أخونك؟
ما أظن أصدق أخونك
لو شافت عيونك إيه حاصل بدونك
دي الدنيا بقت عدم
والفرح من غير نغم
والسعادة بقت وهم
والحلوة من غير طعم
وبرضو تصدق أخونك؟!
يا سلام على ريدي
خلاك بقيت سيدي
لو الأماني بإيدي
كنت أهديك عيوني
وأسقيك من وريدي
يا هنايا وجديدي
يوم أشوفك يبقى عيدي
وبرضو تصدق أخونك؟!
ذكرياتك دايماً أماني
صورة حية لي غرامي
عشتها بروحي وكياني
يا سروري وابتسامي
مهما قلبك جار سباني
انت برضو مثار اهتمامي
وبرضو تصدق أخونك؟

كلمات اغنية الحلوين


الشاعر:عبدالوهآب هلاوي،
! *! *!
عشان خاطر عيون حلوين
بشوف في رموشها ليل ونهار
ولهفة تشيل مشاعرنا
تقصر للخطي المشوار
نجيكم نحنا مشتاقين
فراشات تسأل النوار
وخضرة قولنا عند اللقيا
ياالسمحين تجف تحتار

اغلطو إنتو يا احباب
نجيكم إحنا بالاعذار
عشان خايفين تسيبونا
عشان خايفين نعيش في ودار
حزين قلبآ بزورو الحب
يا ريتو لو ما زار

شلنا الريده يا احباب
يباس ايامنا شلنا خدار
إنتو املنا إنتو اهلنا
في غربتنا إنتو الدار
وشراع الريد بعيد عدي
ويتحدي الزمن لو جار

غربة وشجن


للشاعر :التجاني حاج موسي
؟؟؟
ما اصلو ريده اصبح حياتي
من يوم فؤادي لهواها انهدي
وانا عايش اقاوم في الظروف
راجيها تعطف وتحن للنداء
ماكان محال اهديها الغرام
او ابقي راهب ليها واعبدها

يا غالية يا زينة حياتي
مشتاق لشوفتك لي زمن
وانت عارفة شبابي كلو
وهبتو لي حبك تمن
ألقاك متين وحياة سنين
واتهني بي قربك زمن

لما تهيمي بالبسمة تتفجر
بسيماتك درر
تلقينا في غربة وشجن
تايهات قلوبنا بلا سفر
تملآ من بعدك لهيب
ماصبرنا من بعدك ودر
من بعدك إنتي يعيش منو
ومن تاني مين يتمني العمر

بتبدل مع الايام
ـــــ
بتتبدل مع الأيام
حرام يا غالى تتنكر
ونتقابل بدون كلمات
ولا لمسة حنان تسأل
ربيعى جفت ازهارو
جفنى الليله اتبلل
نسيتنا خلاص
بننساك يوم اتذكر
تحاول تستعيد عشك
تلقي الليل عليك يسهر
وياما الليل يطول بيك
علي الضيعتو تتحسر
حرام يا غالى تتنكر
مصيرك بكره تطرانا
ومصيروا زمانك يتغير
تجيني ويحضنك قلبى
اقول ما كنتا تتنكر
ودموع الحسره لو بتجيب
الضيعتو كان اكتر
حرام يا غالى تتنكر

دنيا المحبة
~ ~ ~
في بعدك يا غالي أضناني الألم
وعشت مع الليالي لا حب لا نغم
وين يا نور عيوني كم طولنا كم
*
من لمسات حنانك خلاص تمينا دور
أيام مرة خالية من طعم السرور
كل ما غنى شادي دوبني الشعور
وأقول يا ريت حبيب لو في الطيف يزور
*
لو كان التمني بينفع كل حبيب
ما كان السعادة بقت قسمة ونصيب
ولا قلوبنا الحيارى مع الايام تشيب
ولا عاش قلبي تايه في حبك غريب
*
لا تسأل مشاعرك ليه عيني بكن
يوم ودعني حسنك ولازمني الشجن
باكر يا حبيبي يعلمك الزمن
ليه دنيا المحبة للعشاق وطن

لواحبك
----
لو أحبك أنا العمر كلو
برضو شاعر ما كفاني
انت فاكر للعواطف
ظاهرة في روحي وكياني
والمحبة البين ضلوعي
خالدة برويها بحناني
إن مساهر بالي فيها
وان نسيت كانت أماني
مشتريها بي شبابي
والشباب ما بجيني تاني
*
بين شفايفك ابتسامة
زي قمر ضوا في حياتي
وكل بسمة بتزيد شجوني
وما في زول يرحم شتاتي
لما تحكي الشوق عينيا
أو تعاتبك اغنياتي
كلمة حلوة من لساني
فيها أجمل ذكرياتي
بس بنظرة بترد عليا
ومن بعيد تلهم سكاتي
*
كن مجامل يا حبيبي
ويكفي انك تصطفيني
عشّي خاوي بالليالي
والنهار بشهد انيني
الضلام بكتب عليهو
بي حروف النور حنيني
والنجوم تشهد ضنايا
وتقرا فيك لمحة ضنيني
متين تعود أيام هنايا
وتاني ترجع تصطفيني

حنين ياليل
-----
حنـــين يا ليل.
يا ساتر عيون الناس
أهم فيك و أناجيك
وأسافر في بحورك ديك
لا بتعب من الإسفار
ولا بغشاني مرو نعاس
لأتي بغازل النجمة
غزل بقوافي منسجمة
وحجوة بصورة منتطمة
وبيها أدغدغ الإحساس

حنـــين يا ليل...يا
يا ساتر عيون الناس

براي سهران كمان زيك
بلاقي عزاي في ريدك
اقالد في النجوم وحدي
وأغني يا ليل مواويل
أصارع الموج والتيار
أغالب الدمعة ما تنهار
أسِــــر البسمة عشان
تضوي لي في المشـوار
حنـــــــــــــــــين يا ليل
يا حنــــــــــــيِـــــن
يا ساتر عيون النـــــــاس

لاهماك عذابنا
+++
كلمات: يوسف محمد يوسف
ألحان: زيدان إبراهيم

لا هماك عذابنا
لا دموعنا وشقانا
نهديك المشاعر وتخون الأمانة
عارف ريدنا ليهو كم قاسينا فيهو
لو غاب من عيونا دقيقة دقيقة نخاف عليهو
أصبح لينا مرسى نرتاح في عينيهو
تمشي تخونا إنت تقول تتهنى بيهو
في ساعة غيابك نسأل وين تكون
وسدناك رموشنا وشلناك في العيون
كيف يرضيك ضميرك تتنكر تخون
العشرة الكانت ببتحدى الظنون
سبتا مصيرنا ضايع مرساه العدم
في بحور السراب بالدمعات وهم
عشان آمالنا فيك قلبنا ما ظلم
خلاص عرف الحقيقة
وما بفيد الندم
لا هماك عذابنا
لا دموعنا وشقانا
نهديك المشاعر وتخون الأمانة

ليه كل العذاب
_
كلمات: التجاني حاج موسى

ليه كل العذاب ليه كل الألم
بزرع في المحبة وحصادي العشم
ليه كل العذاب ليه كل الألم
لسه الفرقة حاصلة وبقاسي الألم
الدرب المشيتو مشيتو عشانك
عذب وزيد عذابك يا سلطان زمانك
عذب وزيد عذابك يا جبار زمانك
كل ما أجيك داني كايس لي حنانك
تبعد مني تقسى وتزيد الألم ألم
لو تعرف يا ظالم بحبك قدر إيه
بحبك والله عالم ده حب احترت فيه
بحبك زي عيوني ولو سألوني ليه
لأنك في عيوني في عيوني الألم
عذب فيني بالغ وزيد منو الكتير
لو يرضيك آذاي عذب يا أمير
قالو البهوا دايماً ياما يشوف كتير
وشفت غلاوتي عندك وحبيت الألم
ليه كل العذاب ليه كل الألم
بزرع في المحبة وحصادي العشم
ليه كل العذاب ليه كل الألم
لسه الفرقة حاصلة وبقاسي الألم
لسه الفرقة حاصلة وبقاسي الألم
لسه الفرقة حاصلة وبقاسي الألم